Act 22 | APZ | STEP | Poul ole ulɨmento, Nɨngkwahwosafo, Mpohwosafo, sekwo upa'nɨmno. Sekwo hungkuno ntohofo so'no ngko nje hungkuno asomo waselɨmonne'no yohono.

Acts 22

1 Poul ole ulɨmento, Nɨngkwahwosafo, Mpohwosafo, sekwo upa'nɨmno. Sekwo hungkuno ntohofo so'no ngko nje hungkuno asomo waselɨmonne'no yohono. 2 Ose ulahonɨngki a'amu Jutaso hofɨkoe hungkuno Hipɨluso upa'nontɨfi songo songo mimmentohofofoho. Poul apa'no ulɨmento,

3 Ngko a'amu Juta hwo'nyoho. Nje na'u kako hwaho Silisiya ango Tasos sopo aswo nɨma'mentisofoho. Ngko engoso olo ango Jelusalem lopo wo'mentohe hwo'nyoho. Ngkimo hungkuno mesyolontɨhwayo sohwo Ngkomeliyelɨyoho. Kako nakwoe ajuyohwosafe honɨngkano ne'njo lontɨhwamojofoho. Oseso ngko Anɨtuye hungkuno yokumpohn'nyo inɨngkayoso sekwo olohonta inɨngkowalokwofo hopa inɨngkamote hwo'nyoho. 4 Ngko a'amu Jisasɨmo sɨmeho hi'ntnnono umotofo somo wonyo uloho'motefoho. Fehohnjo poyo pe'nɨmentohofofoho. Fehohnjo somo ahwomo nano intofonji impo'angomo intofahumentohefoho. 5 Hungkuno nehopi selalokweno. Hwe yofe engo'njo tajo ango syoho'njo sohwo'nji a'amukaunɨsol syoho'njo sohwanji hofɨko olo hilo so'no huno moi'wonoho. Hofɨko nje yahino so'no waselɨfe. Hofɨko a'amu Juta ango Ntomasɨkos humamotofo sohwamne'no ifalifaliyo mtɨ'mokontɨfi ntapmmentohofofoho. Nomanji ole lɨmentoho, a'amu Jisasɨmo inɨngkamotofo somo ahwomo nano intohm'mo ango Jelusalem tohino engo mayo'ne'no womotasɨmne'no yohono lonji umentohefoho.

Poul Anɨtuye a'amu ne imo'nɨmentisofo so'no ulɨmentisofoho.

(Apousel 9:3-19, 26:12-18)

6 Ngko nowenji hinjo sopo Ntomasɨkos mofone sopo i'mofowahonɨngko nɨhu'no komo'no pomponaho engo ahwomo mta'angoso ntoho'mentisofoho. 7 Osohonta hwahopo pɨwasyonji hungkuno ole upa'nɨmentoho. Soul, Soul, Kɨko ngkimo wonyo peho'no ntohofantokuno. 8 Ose ho'nɨngkahonɨngki ngko ulɨmentoho, Hwe engofo, kɨko tɨhwosilo. Ose ulahonɨngko ntɨmento, Ngko Jisas Nasaletnnta'ango hwo'nyoho. Kɨko wonyo ntohofantokuno. Ose ntɨmentisofoho. 9 Hwe ngko'nji umentohofo sohwa hofɨko pomponaho'nohini uhwonɨmentohofofoho. Hofɨko mampaho oso hwe ntɨmentiso sohwo mupa'nyofoho.

10 Ngko ulɨmentoho, Hwe Engofo, ngko pipi imnehono. Ose ulahonɨngko ntɨmento, Kɨko nolɨkafohoji Ntomasɨkosɨmne'no fɨwano. Osopo nuhuji hwe fihwo noku'mahwosi yo'mayo syoho kɨko ihnne'enji imentohe so'no walokitɨhwono. 11 Ose ntahonɨngki oso pomponaho mɨkunɨmposo engoso ntɨmentiso so'no tɨmpi'nyo nɨmo'nɨngkahonɨngki a'amu ngko'nji umentohofo sohwa ngkimo aho nɨmpo'nontɨfi Ntomasɨkosɨmne'no ipemotanɨwomentohofofoho.

12 Oso hopo sopo hwe fihwo humunyoponoho. Kakoe yofe Anonaiyasɨyoho. Kako neyakwosafe honɨngkanomo tɨfi inɨngkawowo'nɨngkiso hweho. A'amu Juta Ntomasɨkos humamotofoso ole hnnɨmentohofi, Kako hwe wopɨngo hweho. 13 Oso hwe huhwo sohwo nonɨ'manto ntɨmento, Nɨngkwahwo Soulɨyo, Jɨje tɨmo apa'no uhwonɨmonnoho. Ose ntahonɨngki oso hohosohonta nje tɨmo wopɨngo nɨmo'nɨngkahonɨngki kakimo uhwonɨmentohefoho. 14 Nuhwonɨngkahonɨngko ntɨmento, Neyakwosafe Anɨtu sohwo kako yo'mayo yone so'no kɨko huno kiyone so'no kuhwosopo'mentisofoho. Kɨko oso hwe ahwomo mta'ango nakwoe hwahopo uhwatɨmentiso sohumo uhwonyo so'no kakoe mampaho upa'nyo so'no kuhwosopo'mentisofoho. 15 Hwangku kɨko kakoe hungkuno ulɨhnnefoho. Kɨko a'amu somo ya'moyo uhwonjo so'no upa'nyo so'no ulɨhnnefoho. 16 Oso'no peho'no hontohumahnno. Kɨko nolɨkafohojo'no ngko mijo wokiyokuma'mo. Kɨko Jisasɨmo jomo ulohojo'no kako jɨje wonyoso wae weekumofono.

Anɨtu a'amu temtitofo kengo somo Poul uyɨmentisofoho.

17 Hwangku ngko Jelusalem apa'no noponji Anɨtuye ango engo somo Mpohumo jomo ulonji wojo hopa uhwonɨmentohefoho. 18 Hwe engo sohumo nuhwonɨngkahonɨngko ntɨmento, Kɨko komo'no Jelusalem ulɨko'maho. Kɨko olopo humahojo'no'manji nje hungkuno lutɨhusoso hofɨko mupa'nɨfitnnehofo. 19 Ose ntahonɨngki ulɨmentoho, Hwe Engofo, hofɨko huno moi'wonoho. Ngko a'amu kikimo sɨmeho hi'ntnnono kijapɨwo'nɨngkohofo somo ango uhu'mokiyoso mta'ango nomanji ikujoho fonjonji impo'angomo intofohumalefoho. 20 Oso hwe Sɨtifen, jɨje hungkuno lɨmojo sohumo fonjahumentohofo sohonta osopo ngko hofɨko'nji nohumanji osohi so'no nje sɨmeho wopɨngo nɨmo'nɨngkahonɨngki a'amu fonjahumentohofo sohwafe manji'mofo yo'mayoso mokosyohumantohefoho. 21 Ose ulahonɨngko ntɨmento Kɨko mpano, Ngko kikimo honɨngkano sawemo sopo a'amu kengo somne'no wokuhwatɨmo. Ose ntɨmentisofoho.

Hwe itokuso'njo mokosyohumayo yofe engo'njo Loum mta'ango sohwo Poulɨmo mokosyohumamentisofoho.

22 Poul oso hungkuno a'amu kengo somne'no ulahonɨngki a'amu Juta nupa'nontɨfi joho mohm'no ulɨmentohofi, Fonjahumno. A'amu oleso olo hwaho lopo mohumanehoho. 23 Oso hungkunoso ne'no lontɨfi hofɨkoe hwapɨfe yo'mayoso yojasyontɨfi hwaho husontɨfi husa'mentohofofoho. 24 Ose yontanɨngkofi hwe yofe engo'njo kakoe a'amu itokuso'njo sohwamo ulɨmento, Poulɨmo angomo ipemotasyɨkuji ole ulɨmno, A'amu sohwa mango engo kilohofoso peho'neto. Oso'no fonaso. Monajo'manji ikujoho wokufonjano. Ose ulɨmno.

25 Ose ulahonɨngki hwe sohwa Poulɨmo hofɨko impe intofontanɨngkofi Poul hwe mnokino manji'mofo'njo kako'njopo humentanjo sohumo ulɨmento, Olo sekwoe yahinotaho. A'amu Loumnta'ango sohumo kakoe hungkuno mɨkwalofe'njo yontɨfi siki ikujoho fongku'motofoso sekwoe yahinotaho.

26 Ose ulahonɨngki hwe sohwo nupa'nonto nowento hwe yofe engo'njo sohumo ulohonɨmento, Kɨko peho yalokuno. Olo hwe lohwo Loummjo sohwafe hwomufoho. 27 Ose ulahonɨngki hwe sohumo nupa'nonto Poulɨmo nu'manto ulohonɨmento, Ole njo. Kɨko Loumnta'ango hwosilaho. Ose ulahonɨngki Poul ulɨmento, Ou, ngko Loum mta'ango hwo'nyoho. 28 Ose ulahonɨngki hwe yofe engo'njo sohwo ulɨmento, Ngko hamniyoho engo ho'naofonji a'amu Loum imo'nɨmentohe hwo'nyoho. Ose ulahonɨngki Poul ulɨmento. Nje mpohwo Loum mta'ango hweho. Oso'no ngko a'amu Loum hwo'nyoho. 29 Ose ulahonɨngki a'amu Poulɨmo impe intofontɨfi ikujoho wofonjantɨfi imentohofo sohwa uyohohu'mentohofofoho. Hwe yofe engo'njo sohwo olo a'amu Loum mta'ango lohumo impe intofohe so'no tohino engo woma'monntɨkeno. Ose lonto iyoho unɨmentisofoho. ^{▼▼22:29 Loumjo sohwafe honɨngkano hungkunoso olenoho. A'amu Loum mta'ango sohumo ikujoho fongkiyo so'no yokumpohn'nyo wo'nyofoho.}

30 Hwe yofe engo'njo sohwo kako a'amu Juta Poulɨmo hungkuno ulohofo so'no yoloho hwapɨngo upa'nɨmo lonto mo'nɨngkanta Poulɨmjo ahwomo nano usɨhutofonto kako a'amu tajo ango syoho'njo yofe engo'njo sohwanji a'amukaunɨsol syoho'njo sohwanjimo hungkuno ole lɨhwatɨmento, Sekwo uhu'mokumno. Ose lɨhwajonto Poulɨmo ipemotasonto a'amufe sɨmanopo uhumatɨ'mentisofoho.